Зәйдә яшүсмерләр хокук саклау органнары эшчәнлеге белән таныштылар

Яшүсмерләр район эчке эшләр бүлегендә булып, хокук саклау органнары эшчәнлеге белән таныштылар.

Очрашу мөһим профилактик һәм профориентацион әңгәмәдән башланды. Полиция хезмәткәрләре яшь кунакларга үз хезмәтләренең үзенчәлекләре, бүлекләр структурасы турында җентекләп сөйләделәр. Хокукый грамоталылык мәсьәләләренә аерым игътибар бирелде: яшүсмерләргә хокук бозуларны булдырмау турында искәрттеләр, алар өчен җаваплылык турында аңлаттылар.

Киләчәк карьерасы турында хәзердән үк уйланучы егетләр өчен полиция хезмәткәрләре бик яхшы мөмкинлек тәкъдим итте. Эчке эшләр министрлыгы системасының профильле югары уку йортларына максатчан юнәлеш буенча керү. Яшүсмерләргә мондый форматның өстенлекләрен аңлаттылар: түләүсез уку, тотрыклы стипендия, тулы дәүләт тәэмин ителеше һәм диплом алганнан соң ук туган районыңда гарантияле эш урыны.

Яшүсмерләр өчен иң кызыклысы бармак эзләрен алу процессы (дактилоскопия) һәм кинология хезмәте белән танышу булды. Хезмәткәрләр үзләренең дүрт аяклы иптәшләре белән эшләү үзенчәлекләре, аларның рационы һәм күнегүләре турында сөйләделәр.

Экспертлар мондый очрашулар яшьләрнең дөньяга карашын киңәйтеп һәм булачак һөнәрләрен билгеләргә ярдәм итеп кенә калмый, ә үсеп килүче буында җаваплылык һәм законга хөрмәт хисе формалаштыра дип ышана.

Фотолар яшьләр эшләре идарәсеннән.