Зәйдә «Чаңгы юлы чакыра» акциясе узды

«Радость» халыкка социаль хезмәтләр күрсәтү үзәге белгечләре, спорт һәм яшьләр эшләре идарәләре  берлектә балигъ булмаган социаль хезмәт алучыларга чаңгыда йөрү шатлыгы бүләк иттеләр. 

“Әлеге чараның максаты - балаларның аралашу өлкәсен киңәйтү, балаларның сәламәт яшәү рәвешен формалаштыру”, - ди социаль белгечләр.

Чара программасына шулай ук Олимпия чемпионы Федор Симашев исемендәге спорт резервы мәктәбе, тренер-укытучы һөнәре белән танышу да кертелгән иде.

Сәяхәт шәһәрнең урман массивындагы чаңгы базасына барудан башланды. Балаларны чаңгы базасы бинасының урнашуы, чаңгыда шуганда куркынычсызлык кагыйдәләре, яктыртылган трасса схемасы белән таныштырдылар.  

Тәҗрибәле тренер балаларга чаңгыда йөрү күнекмәләре турында сөйләде, алар теорияне практикада ныгыттылар - яктыртылган трасса буйлап бер чакрым чаңгыда шудылар.

Аннан социаль хезмәт алучылар автобуста спорт мәктәбе бинасына бардылар, анда алар шәһәрдә һәм районда чаңгы спорты үсеше тарихы, чаңгы мәктәбенең тренерлар составы, чаңгычы-узышчылар кышкы һәм җәйге инвентарьлары, спорт белән шөгыльләнү өчен заллар һәм тренажер бүлмәләре белән таныштылар.

Методист балаларга Олимпия чемпионы Федор Петрович Симашевның тормышы һәм эшчәнлеге, безнең чаңгычыларның Бөтенроссия һәм республика ярышларында җиңүләре турында сөйләде.    

Саф һавада актив һәм танып белү чарасы малай-кызларның хәтерендә озакка истә калачак. Чаңгы узышлары белән шөгыльләнергә теләүчеләр тренировка процессына чакырылды.

Фотолар социаль үзәктән.