Зәй районында Халыкара инвалидлар декадасында вакансияләр ярминкәсе оештырылды

Чара “Кадрлар” илкүләм  проекты кысаларында оештырылды һәм Халыкара инвалидлар ункөнлегенә  багышланды. Аның максаты – сәламәтлек мөмкинлекләре чикләнгән затларны да кертеп, гражданнарны эшкә урнаштыруга ярдәм итү. Ярминкәдә Зәй муниципаль районы мәгариф идарәсе, «Радость» халыкка социаль хезмәт күрсәтү комплекслы үзәге, «Татэнерго» АҖ филиалы - Зәй ГРЭСы катнашты. Оешма вәкилләре эш эзләүчеләр өчен индивидуаль консультацияләр уздырды, кандидатларга һәм хезмәт шартларына таләпләр турында сөйләделәр, карьера перспективалары һәм яңа хезмәткәрләрне адаптацияләү программалары турындагы сорауларга җаваплар бирделәр. Ярминкәдә 43 вакансия тәкъдим ителде. Тәкъдимнәр арасында – төрле квалификацион дәрәҗәдәге һөнәрләр: электрослесарь, энергоблок машинисты, токарь, кондитер, пешекче, кухня эшчесе, кече тәрбияче, мәдәни чаралар оештыручы, психолог, методист, бухгалтер, урам себерүче  һәм башкалар бар иде. Вакансияләрнең мондый диапазоны  төрле тәҗрибә һәм әзерлек дәрәҗәсе булган аудиторияне колачларга мөмкинлек бирде. Ярминкәгә эшкә урнашу белән кызыксынган 18 граждан килде. Эш бирүчеләр 8 кеше белән шәхси әңгәмәләр уздырып, аларның кандидатураларын алга таба карау өчен анкеталар тутырттырдылар.

Бу эш бирүчеләрнең һәм эш эзләүчеләрнең турыдан-туры очрашулары форматының кирәклеген, район халкы өчен тәкъдим ителгән вакансияләрнең актуальлеген күрсәтә. Вакансияләр ярминкәсе хезмәт базарында киеренкелекне киметүгә, гражданнарның төрле  категорияләрен эш белән тәэмин итүгә ярдәм итүгә, мәшгульлек хезмәтләре һәм эш бирүчеләр арасында партнёрлыкны ныгытуга юнәлдерелгән «Кадрлар» илкүләм  проектының бурычларын гамәлгә ашыруда мөһим адым булды.

Белешмәләр һәм булачак чараларда катнашу өчен Зәйдәге Нефтьчеләр проспектында урнашкан  Кадрлар үзәгенә мөрәҗәгать итегез, яисә 8(843)222-05-57(доб.2806) номерына шалтыратыгыз.