Зәй районында авыл халкы онкология авыруларына бушлай тикшерү үтә

Югарышепкәлеләр иртә таңнан ук «Флюмамм» күчеп йөрүче медицина комплексы янында чиратка басты. Монда табиблар ике төрле тикшерү үткәрәләр — флюорография һәм маммография.

— Без — авыл халкына шәһәр поликлиникасына бару мәшәкатьле, авыл халкы өчен мондый мөмкинлек тудырылуына бик шатбыз һәм берьюлы ике тикшерү үтәргә була, — ди авыл халкы.

Мобиль комплексның эш графигы: 8 апрельдә — Югары Шепкә торак пункты, 9 апрельдә — Аксар, 11 апрельдә — Сәвәләй, 12 апрельдә — Якты Күл, 22 апрельдә — Бигеш, 23 апрельдә — Түбән Биш, 24 апрельдә — Кадер, 25 апрельдә — Сарсаз-Баграж, 26 апрельдә — Ал. Бистәсе ФАПы.

Күрше авылларда яшәүчеләр дә тикшерү үтә ала. Бу эш хатын-кызлар һәм ир-атлар арасында онкологияне профилактикалау өчен башкарыла.