Зәй районы башлыгы Мирный, Икмәк кабул итү һәм Нефть базасы бистәсендә яшәүчеләр белән очрашты

Чираттагы очрашу Мирный бистәсе мәдәният йортында узды, анда бистәләрнең актив кешеләре җыелды.

Район башлыгы Разиф Кәримов агымдагы елның беренче яртыеллыгында муниципалитетның социаль-икътисади үсеше турындагы хисап белән чыгыш ясады, һәр тармакның эшенә җентекләп анализ ясады һәм киләчәккә планнар белән уртаклашты. Ул билгеләп үткәнчә, илебездәге катлаулы икътисади вазгыятькә карамастан, Зәй районы тотрыклы үсештә, барлык сәнәгать предприятиеләре эшли һәм продукция җитештерә. Район башлыгы зәйлеләргә шәһәр-район үсешенә керткән өлешләре һәм махсус хәрби операциядә катнашучыларга һәм аларның гаиләләренә ярдәмнәре өчен рәхмәт белдерде.

Шәһәр башкарма комитеты җитәкчесе Наталья Павлова микрорайоннарны төзекләндерү, суүткәргечләрне алыштыру эшләренең барышы һәм Яңа шәһәрдә яңа зират булдыру планнары белән таныштырды. Шулай ук микрорайонда урнашкан 5нче мәктәпнең фасадын җылыту һәм яңарту планлаштырыла. 

Эчке эшләр бүлеге башлыгы Олег Камалюков шәһәрдәге оператив вазгыять, интернет-мошенниклардан саклану чаралары һәм пилотсыз очкычлар һөҗүме вакытында халыкның гамәлләре турында сөйләде. 

Очрашу азагында район һәм шәһәр җитәкчелеге зәйлеләрнең сорауларына җавап бирде, алар үзләрен борчыган проблемалар буенча консультацияләр алды.