Зәй полиция хезмәткәре гүзәллек бәйгесендә катнашты

10 ноябрьдә Россия Федерациясе Эчке эшләр органнары хезмәткәрләре көне билгеләп үтелә.

Бүген хатын-кызларыбыз үзләштермәгән һөнәр, башкармаган эш бар микән?! Иминлегебезне саклаучылар, куркынычсызлыгыбызны тәэмин итүчеләр арасында нечкә күңелле, шул ук вакытта нык характерлы хатын-кызларыбыз булуы аеруча мактауга лаек. Шуларның берсе — район эчке эшләр бүлеге хезмәткәре Татьяна Захарова.

Ул 2018 елдан район эчке эшләр бүлегендә хезмәт куя. Полиция хезмәткәрләренең графигы һәм тормышы һәрвакыт югары ритмда баруын һәркем белә — барысына да өлгерергә кирәк. Татьяна Андреевна да актив тормыш рәвеше алып бара, «Джампинг» спорт батутларында сикерүләр белән мавыга, быел март аенда Чаллы шәһәрендә «Unique Woman» матурлык конкурсында катнашып, «Top Woman 2024» дигән яңа титул алган.

«Тормышта һәрвакыт дөрес өстенлекләр, максатлар куярга һәм аларга ирешергә тырышырга кирәк. Безнең бөтен тормышыбыз конкурс кебек һәм без җиңүчеләр булырга тиеш. Эчке эшләр органнарында хезмәт итү миңа яхшы тормыш тәҗрибәсе багажы һәм чыныгу бирде. Эчке эшләр органы хезмәткәрләре көне уңаеннан мин хезмәттәшләремә нык сәламәтлек, рухи ныклык телим, ә теләге булган яшьләрне безгә эшкә чакырам», — ди Татьяна Захарова.

Фотолар шәхси архивтан.