Зәй юл хезмәтләре көчәйтелгән эш режимына күчте

Урамнарга һәм тротуарларга хезмәт күрсәтүче юл эшчеләре көчәйтелгән эш режимына күчтеләр. 

«Благострой» ҖЧШ оешмасы җитәкчесе Максим Сабанов бу чорда юлчыларның хезмәт көне караңгыда - иртәнге сәгать 5ләрдә үк башлануын ассызыклый.

-Гадәттә бу машина юлыннан чүп-чар җыюдан, павильоннарны һәм тукталышларны җыештырудан башлана. Шулай ук көчле җилдән яисә машина бәрүдән зыян килгән юл билгеләрен төзәтәбез. Көзге чорда, яфраклар коела башлаганда, яфракларны җыюга максималь басым ясыйбыз, - ди ул.

Бу эш урамнарны су басуны булдырмау өчен бик мөһим. Юеш яфраклар, пычрак белән кушылып, яңгыр канализациясен тутыра. Аларны чистарту - юл эшчеләренең төп бурычларыннан берсе. Механикалаштырылган җыештырудан соң махсус техника эшкә керешә.

-Яфраклар коелу тәмамлангач, юлчылар кышка финал әзерлекләренә күчәләр. -Бозлавыкка каршы реагентлар җитәрлек күләмдә, - ди Максим Сабанов.

Бүгенге көндә оешмада 29 кеше эшли, әмма якын арада штат арттырылачак.

фотолар «Благострой» оешмасыннан