«Зәй-информ»да беренчеләрне котладылар

Ә беренчеләр «Зәй офыклары»ның компьютерда газетаны калыплаучы операторы Гөлназ Ходжаеваның улы Реналь Ходжаев, «Зәй — ТВ»ы журналисты Адилә Борһанова кызы Сәфинә Борһанова. Реналь шәһәрнең Ринат Фәрдиев исемендәге, әле быел гына яңартылган татар гимназиясенә укырга бара.

— Мин мәктәпкә бару көннәрен түземсезлек белән көтәм. Яңа мәктәбебез яныннан узганда тизрәк аның эченә керәсем, парта артына утырасым килә. Ә мәктәпкә әзерләнеп без әнием белән инде укырга, санарга өйрәндек, «Кояшкай» бакчасында да безне хәреф танырга, математика буенча саннар язарга, санарга, кушарга, алырга өйрәттеләр, — ди Реналь дулкынланып.

Сәфинә исә шәһәрнең 6нчы мәктәбе укучысы булачак. Аның максаты гел «5»ле билгеләренә генә уку.

— Минем яхшы укып әти-әниемне сөендерәсем килә. Мәктәптә укытучы апаларның һәр әйткәнен ныгытып истә калдырырга уйлыйм, — дип елмая ул.

Редакциябездә булачак беренче сыйныф укучыларын менә шулай сөендерү күркәм традиция булып яши. Балаларга бүләкләрне «Татмедиа» АҖ әзерләде. Мәктәп букчасы эчендә җәмгыять тарафыннан махүсус әзерләнгән басма продукция.

— Беренче сыйныфка баручылар өчен Белем көне аеруча истәлекле вакыйга, шуңа да без аларны бу бәйрәм алдыннан сөендереп, бүләкләр тапшыру традициясен дәвам итәбез. Хезмәткәрләребезнең балалары үзләре кебек тырыш булып, яхшы укулары, үрнәк тәртипләре белән сөендерсеннәр, — диде тәбрикләү сүзләрен җиткереп Александр Кузьмич.