Зәй яшүсмерләре җәйге каникулларны хезмәт белән уздыра

Зәй районында да яшүсмерләрне җәйге чорда эшкә урнаштыру буенча эш бирүчеләр белән тыгыз эшчәнлек алып барыла. Район мәшгульлек үзәге консультантлары яшьләргә һөнәри юлларын башлап җибәргәндә комплекслы ярдәм күрсәтәләр.

Хәзер районда яшүсмерләрне эшкә урнаштыру буенча актив кампания башланды. Агымдагы елның июнендә районда яшәүче 89 балигъ булмаган кеше рәсми рәвештә эшкә урнаштырылды.

Балигъ булмаган гражданнарны җәйге чорда вакытлыча эшкә урнаштыру программасы Зәй районы эш бирүчеләре белән тыгыз элемтәдә гамәлгә ашырыла. Агымдагы елда яшүсмерләргә эш урыннары биргән дүрт оешма белән хезмәттәшлек турында килешүләр төзелде.

Төп партнерларның берсе «Минем ишегалды лагере» проектын җитәкли торган «Яшьләр үзәге» муниципаль бюджет учреждениесе. Әлеге проект кысаларында июньдә 58 яшүсмер әйдаманнар вазифаларын башкара һәм ишегалды лагерьларында балаларның ялын оештыра.

Проектны гамәлгә ашыруга ГРЭС оешмасы да кушылды. Июнь аенда 28 яшүсмер әлеге предприятиегә  вакытлыча эшкә алынды. 

Моннан тыш, «Уймак  кыз» балалар бакчасына тәрбияче ярдәмчесе вазыйфасына бер һәм идарәче компаниягә ике укучы кабул ителгән.

Балигъ булмаганнарны эш белән тәэмин итүне оештыру аларның яшь үзенчәлекләрен һәм хезмәт законнары таләпләрен исәпкә алып гамәлгә ашырыла. Эш көне 4 сәгатьтән 7 сәгатькә кадәр дәвам итә, төнге сменалар, өстәмә эш вакыты һәм озын командировкалар булмый. Эшкә рәсмиләштерү алдыннан яшүсмерләр ата-аналары яки опека органнары белән килештереп мәҗбүри юридик рөхсәт процедурасын үтәләр.

Хезмәт хакы күләме эш бирүченең түләүләре һәм кадрлар үзәгенә матди ярдәм күрсәтү хисабына формалаштырыла.
Татарстан Республикасының Зәй районы буенча кадрлар үзәге балигъ булмаганнарны вакытлыча эш белән тәэмин итүне оештыру белән кызыксынган эш бирүчеләрдән гаризалар кабул итүне дәвам итә. Яшьләргә һөнәри эшчәнлекнең башлангыч этабында ярдәм итү районның һәм тулаем республиканың социаль-икътисадый үсешенә мөһим инвестиция булып тора.