«Вакыт капсуласы» 2035 елның 8 маенда ачылачак

Аны 10 елдан соң Бөек Җиңүнең 90 еллыгы уңаеннан киләчәк буыннар алып укыячак. «Вакыт капсуласы» акциясен туган як тарихын өйрәнү музее хезмәткәрләре оештырды.

Акция кысаларында Бөек Ватан, әфган, чечен сугышлары ветераннары, концлагерь тоткыннары, махсус хәрби операциядә катнашучылар киләчәк буынга хат — юллама язып, аны капсулага салдылар.

«Вакыт капсуласы» — бу тарихи хәтерне саклау һәм буыннар арасында дәвамчанлыкны формалаштыру.

20 мартта музейда узган чарада әфган, чечен сугышы һәм махсус хәрби операция ветераннары катнашты. Алар белән очрашуга 1нче мәктәпнең III, VII сыйныф укучылары килде. Чарада шәһәр башлыгы урынбасары Сергей Максимов катнашып, чыгыш ясады.

— Быел без Бөек Җиңүнең 80 еллыгын билгеләп узабыз. Мин дә кайчандыр сезнең яшьтә Бөек Ватан сугышы ветераннары белән аралаша идем. Алар ул вакытта күп иде әле. Һәрберсе бары тик бер теләкне яңгыратты — «сугышлар гына кабатланмасын!» 80 ел узгач, бу сүзләр аеруча актуаль. Бүген дә безнең бик күп ир-егетләребез илебез сагында тора. Алар сезнең киләчәк матур тормышыгыз өчен көрәшә. Үз Ватаныңны ярату, аның тарихын белү бик мөһим. Илебезнең лаеклы дәвамчылары булып үсегез, — дип мөрәҗәгать итте Сергей Васильевич укучыларга.

Укучылар тарихка кереп калачак мизгелнең шаһитлары булды.

«Без бу вакыт капсуласын 2035 елның 8 маенда Бөек Җиңүнең 90 еллыгын һәм безнең музейның ярты гасырлык юбилеен билгеләп үткәндә ачачакбыз. Безнең бабаларыбыз зур сынаулар аша үткәннәр һәм барлык авырлыкларны җиңеп чыкканнар. Буыннарны бәйләүче тере җеп өзелмәсен иде», — диде музейның кече фәнни хезмәткәре Алсу Шаһабиева.

Хөрмәтле кунаклар киләчәк буыннарга теләкләрен җиткереп хат яздылар һәм аны капсулага салдылар.

Вакыт капсуласын салу хокукы районыбызның яшь вәкилләре — Әмир Габдуллин, Илзирә Ждановага бирелде. Юллама белән капсула саклагычка урнаштырылды.