Түбәнлоҗылылар махсус хәрби операциядә катнашучыларга төрле яклап ярдәм күрсәтә

-Без махсус хәрби операциядә катнашучыларга маскировка челтәрләре үрәбез. Бу эш районның берничә авылында оештырылды. Безнең челтәрләр үрүчеләр турында Зәй хәрбиләре генә түгел, ә илебездән төрле частьләрдә хезмәт итүчеләр дә белә. Шуңа күрә безнең маскировка челтәрләренә заказлар да бик күп. Тукымаларны заказ буенча кайтартабыз. Түбән Лоҗы халкы безгә материаллар алу өчен даими акчалата ярдәм итеп килә. Авыл клубында челтәр дә үрәләр, финанс яктан да булышалар. Ышанычлы тыл алар, бик зур рәхмәт, - ди Зәйдә маскировка челтәрләре үрү эшен оештырган Елена Хисаметдинова.
Искечә Яңа ел бәйрәмендә Түбән Лоҗы клубында маскировка челтәрләре үрүчеләр өчен ял кичәсе оештырылды.
-Узган елның 2 февраленнән бер көн калмый сетка үрергә йөрүче ханымнарны җыеп, бераз ял иттереп, бәлеш-гөбәдияләр белән сыйлап, җырлатып-биетеп алдык. Бәйрәмгә Кыш бабай белән Кар кызы да килде, уеннар да уйнаттылар, бүләкләр дә өләштеләр, кәнфит-прәнник биреп шигырьләр дә сөйләттеләр. Бөтенебезне бер теләк берләштерә - тизрәк бәрелешләр бетеп, газиз улларыбыз гаиләләренә исән-имин әйләнеп кайтсыннар иде, - ди клуб директоры Энҗүдә Исламова.
Фотолар авыл клубыннан.