Татарстанда температура аермасы 22 градуска җитәчәк

Бүген, 19 мартта, Татарстанда аномаль җылы һава торышы сакланачак. Синоптиклар фаразлавынча, температура фоны күтәрелүен дәвам итә, ә көндезге һәм төнге күрсәткечләр арасындагы аерма 22 градуска кадәр җитәчәк. Бу хакта «Татар Информ» хәбәр итә. 

ТР Гидрометеорология үзәге мәгълүматларына караганда, республикада алмашынучан болытлы һава саклана. Явым-төшем көтелми. 

Төнлә һава температурасы -1…-6 градус, көнчыгыш районнарда -10 градуска кадәр төшәчәк. Көндез исә +4…+9 градуска кадәр җылыначак, ә кайбер көнчыгыш районнарда температура +12 градуска кадәр күтәреләчәк. Казанда көндез +9…+11 градус көтелә.

Метеорологлар мәгълүматларына караганда, якындагы көннәрдә дә аномаль җылы һава торышы сакланачак һәм яңа рекордлар ихтимал. Әмма ТР Гидрометеорология үзәге башлыгы Феликс Гоголь сүзләренчә, республикага яңадан салкыннар кайтырга мөмкин.

Чыганак: Татар-информ

фото редакция архивыннан