“Татарстанда җәй” программасы буенча Зәй тарихы

Чара Зәйнең сирәк очрый торган фотосурәтләре тәкъдим ителгән «Зәй тарихы» күргәзмәсеннән башланды. Балаларда шәһәрнең кош очышыннан төшерелгән фотолары аеруча кызыксыну уятты, анда дистә еллар дәвамында яр буе һәм төзелешләрнең ничек үзгәрүен карарга мөмкин иде. Музей экскурсоводы һәр фотосурәт турында җентекләп сөйләде, яр буе ничек төзелгән, бу урыннарда нинди вакыйгалар булган һәм шәһәр тарихы аның кыяфәтендә нинди чагылыш тапканын аңлатты.

Күргәзмә белән танышканнан соң катнашучылар бердәм командага берләшеп, билгеләнгән сигез нокталы карта алып, яр буеның төрле почмакларында махсус урнаштырылган музей артефактларын эзләргә киттеләр. Сигез артефакт бер-бер артлы табылды. Экскурсовод һәр  табылдыкның тарихи кыйммәтен аңлатты: мамонт теше - бозлык чоры, кыңгырау кыйпылчыгы 1707 елгы Зәй крепосте һәм аның фаҗигале язмышы турында сөйли, тәңкә Бәтке сәүдә тракты буйлап үткән сәүдәгәрләр кәрваннарын искә төшерә, ә беләзек, кабырчык, сөяк, сәгать төрле чор кешеләренең тормыш һәм көнкүреш картинасын тулыландыра. 

Уенның финал этабы табылган артефактлар өчен алынган хәрефләрдән төп сүзне төзү булды. Команда биремне уңышлы үтәде һәм «мирас» сүзен төзеде, ул бөтен чараның төп төшенчәсенә әверелде, тарихны, мәдәниятне һәм буыннар хәтерен берләштерде. 

Квест тәмамланганнан соң барлык катнашучыларга татлы бүләкләр һәм туңдырма өләшенде.

Фотолар музейдан.