Мирныйлылар язгы өмәләргә чыга башлады

Кыш буе ничек яшәгәнлегебезне язын бик ачык күрергә була. Кар эри башлаганда аның яшеренгән бөтен чүп-чар баш калкыта. Монда ярдәмгә өмәләр килә.

Мирный бистәсендә өмәгә чыгучылар Мичурин урамы юл буенда аунап ятучы пластик шешәләр, кәгазь һәм башка көнкүреш чүп-чарын җыйдылар.

— Кызганычка каршы, мондый күренеш безнең өчен гадәти хәлгә әверелде һәм хәл елдан-ел кабатлана. Кайберәүләр чүп машинасы килеп торса да, чүпләрен йорт почмагында яки гараж янында, кайда эләксә шунда калдыралар. Халыктан аңлы булуларын һәм чүпне теләсә кайда ташламауларын, шулай ук балаларыбызда әйләнә-тирәбезгә сакчыл мөнәсәбәт тәрбияләүләрен сорыйбыз, — ди «Мирный» үзидарәсе рәисе Гөлбану Галяминская.

Җыештырган урында түгел, ә чүпләмәгән җирдә чиста була, диләр. Шуны онытмасак иде.

Фотолар «Мирный» үзидарәсеннән.