Мирный бистәсендә мәдәният хезмәткәрләре кар чистарту буенча гомумшәһәр өмәсенә чыктылар

Быелгы кышта көне-төне диярлек буранлап яуган кар шәһәрдә, авылларда яшәүчеләргә дә, юлларны тәртиптә тотучы юл хуҗалыгы хезмәткәрләренә дә өстәмә мәшәкатьләр, кыенлыклар тудыра.

5 февральдә Зәйдә сәнәгать предприятиеләре, оешма-учреждениеләр, торак милекчеләре шикрәтләре һәм идарәче компания хезмәткәрләре үз территорияләрендә һәм янәшәдәге биләмәдәге карны чистартуга чыкты.

Мирный бистәсенең шәһәр мәдәният йорты хезмәткәрләре дә гомумшәһәр өмәсенә кушылдылар.

— Барыбыз бергәләп кар чистарттык, шул ук вакытта бергәләп хезмәт кую күңелле дә. Ахырда хезмәт нәтиҗәләрен күрү иҗади эшкә дә рухландыра. Саф һавада эшләү рәхәт кенә түгел, ә файдалы да бит, — ди шәһәр мәдәният йорты директоры Фәннур Миннекәев.

Фотолар шәһәр мәдәният йортыннан.