Махсус хәрби операциядә һәлак булган Сарсаз-Баграж егетенең әти-әнисенә дәүләт бүләге тапшырылды

28 августта район башлыгы Разиф Кәримов махсус хәрби операциядә һәлак булган хәрбиләрнең әти-әниләренә, якыннарына дәүләт бүләкләрен тапшырды. Тантанага Николай Фроловның әнисе Клара Алексеевна белән Николай Кузьмич та чакырылган иде.

-Батыр уллар үстергән әти-әниләргә рәхмәт. Сезнең иңнәргә төшкән кайгыны берни белән дә аңлатып булмый. Түземлек телибез сезгә. Батыр сугышчыларыбыз – үсеп килүче буыннарга мисал, батырлык һәм кыюлык үрнәге, - диде чыгышында Разиф Галиевич.

Николай үзе исән чагында - 2024 елның 25 апрелендә махсус хәрби операция зонасында күрсәткән каһарманлыгы һәм кыюлыгы өчен “Батырлык өчен” медале белән бүләкләү турында Россия Президенты Указы чыккан. Кызганыч, Николай Николаевич 2 майда хәрби бурычын үтәгәндә батырларча һәлак булды. Ул медальне ала алмыйча калды.

Николай Фролов Россия Президенты Указы белән шулай ук Батырлык орденына (һәлак булганнан соң) да тәкъдим ителгән.