Кадер бакчасында тәрбияләнүче балалар маскировка челтәрләре үрүчеләр янында булды

Бүгенге көндә, һәркем, ничек тә булса, махсус хәрби операциядә катнашучыларга ярдәм итәргә тырыша. Кемнең кулыннан нәрсә килә, кем ничек булыша ала — барысы да тырыша. Хәрбиләргә ярдәмнең төрле юллары эзләнә. Маскировка челтәрләре — хәрби зонада иң мөһим әйберләрнең берсе, шуңа күрә Кадер авылы җирлеге халкы да бу эшкә алынды.

«Кадер авылы „Кояшкай“ балалар бакчасы да бу эштән читтә калмады. 23 февраль — Ватанны саклаучылар бәйрәме уңаеннан маскировка челтәре үрүче апаларның күңелен күтәреп, концерт номерлары күрсәттек. Ә махсус хәрби операциядә катнашучы солдатларга җибәрү өчен балалар бүләкләр әзерләде. Балалар ясаган рәсемнәрне без челтәр үрүче апаларга сетка эченә төреп җибәрү өчен тапшырдык», — ди тәрбияче Гөлназ Закирова.