Яшь зәйлеләр Кырым язын йөгереш белән билгеләп үттеләр

Зәй районы бу истәлекле датаны бәйрәм итүгә актив кушылды. Чараларның иң якты катнашучыларының берсе "Барс" спорт мәктәбе тәрбияләнүчеләре булды, алар патриотик җиңел атлетика йөгереше оештырдылар.

2014 елның 18 марты Россия дәүләте яңа тарихының елъязмасына чын батырлык һәм халык хакимияте үрнәге, тарихи гаделлек тантанасы булып мәңгегә язылды. Унике ел элек Кырым ярымутравы һәм герой-шәһәр Севастополь халкы уртак язмыш, күпгасырлык мәдәният һәм рухи тамырлар берләштергән Россия белән бергә булу юлын аңлы, ирекле һәм ныклы рәвештә сайлады.

Бүген Зәйдә бу датага багышланган тематик дәресләр һәм чаралар уза. Ә кичә – 17 мартта Зәйдә Кырымның Россиягә кушылган көнен билгеләп үтү яшь спортчылар  оештырган динамик һәм символик акциядән башланды.

"Барс" спорт мәктәбе тәрбияләнүчеләре  кулларына Россия әләмнәре тотып,  йөгерешкә чыктылар.

-18 мартта без Кырымның Россия белән кушылу көнен билгеләп үтәбез. Бу вакыйга хөрмәтенә без җиңел атлетика йөгереше үткәрергә булдык. Анда безнең мәктәптә тәрбияләнүчеләр катнаша. Алар боз сараеннан старт алып, чиркәүгә кадәр йөгерәләр, - диде  "Барс" спорт мәктәбенең инструктор-методисты Ләйсән Кулеева.

Яшь спортчылар колоннасы, ил флагларын тотып, урам буйлап дистанцияне үтте. Оештыручылар фикеренчә, мондый акцияләр спорт рухын саклау өчен генә түгел, ә үсеп килүче буынны ватанпәрвәрлек үрнәгендә тәрбияләү өчен дә мөһим.

- Без үз тарихыбызны белергә,   зур илнең бер өлеше булуыбызны истә тотарга тиеш. Безнең шәһәр бу традицияне хуплавы бик яхшы, - дип уртаклашты эмоцияләре белән йөгерештә катнашучы Максим Комендантов.

Айгөл Яруллина фотолары.