Яшь һөнәр осталары — илкүләм бәйге җиңүчеләре

17 мартта Казан шәһәренең 187нче күппрофильле лицее базасында Татарстан Рәисе Рөстәм Миңнеханов 2024 елда «Профессионаллар» һәм «Абилимпикс» чемпио-натларында җиңүчеләр, призерлар һәм остазлар белән очрашты.

Әлеге илкүләм бәйгеләрдә Татарстан командасы икенче урын алды. «Профессионаллар»да — 180, «Абилимпикс»та 72 медаль татарстанлыларда. Җиңүчеләр арасында безнең ГРЭС хезмәткәрләре һәм политехник көллият студенты булуы аеруча куанычлы.

Рәис белән очрашуда студент егет Раил Нуруллин, ГРЭС хезмәткәрләре Булат Шәйхетдинов, Эрик Полка, Инга Санникова, Раил Рәхимов катнаштылар.

«Ярышларда катнашкан егетләргә һәм кызларга, аларны әзерләгән укытучыларга һәм остазларга чиксез рәхмәт!» — дип язалар ГРЭСның Телеграмм каналында.

Раил Нуруллин 2024 елда «Профессионаллар» төбәкара чемпионатында «Электр тапшыру кабель линияләрен эксплуатацияләү» компетенциясе буенча көмеш медаль алды. Бүген инде егет финиш сызыгында — аның алдында җитештерү практикасы, диплом яклау кебек бурычлар тора.

Раилне «Профессионаллар» төбәкара чемпионатына остазлар Александр Тихонов һәм Рамилә Вандык әзерләде.

„Чемпионатта җиңү миңа уку йортын, белгечлегемне дөрес сайлавымны тагын бер кат дәлилләде“, — ди Раил.