Яңа төр гаскәрләр булдырыла

8 декабрьдә район хакимиятендә җирле массакүләм мәгълүмат чаралары һәм ведомстволар вәкилләре алдында Казан шәһәренең контракт буенча хәрби хезмәткә сайлап алу пункты башлыгы, подполковник Андрей Козлов чыгыш ясады.

Сайлап алу пункты Россия Федерациясе Кораллы Көчләрен комплектлаштыру, махсус хәрби операциядә  хәрби хезмәткә җибәрү белән шөгыльләнә. Республикада бердәнбер һәм Үзәк хәрби округта аз санлы сайлау пунктының Африка корпусына кандидатлар җибәрү хокукы да барлыкка килде.

“Агымдагы атнадан гаскәрләрнең яңа төре – пилотсыз системалар гаскәрләренә масштаблы җыю башланды. Безнең Үзәк хәрби округта пилотсыз очучы системалар полкы формалашты. Бу полкны хәзер киңәйтәләр, яңа вакантлы вазифалар өстәлде. Гражданнарны анда хәрби хезмәт узарга чакырабыз. Гаскәр ротасын тулы бер хәрби частьлар, батальоннар, бригадалар, полклар формалаштыра. Болар барысы да, гаскәрләрнең аерым ротасы буларак, Кораллы Көчләр составына керәчәк”, – ди Андрей Козлов.

Элегрәк контракт буенча хезмәткә  хәрбиләр десант, разведка һәм инженерлык һәм башка частьларга җыелса, хәзер акцент пилотсыз очу һәм җир өсте аппаратлары, шулай ук экипажсыз катерлар белән җиһазландырылган хәрби частьлар һәм бүлекчәләр формалаштыруга бирелә. Бу юнәлеш үз кагыйдәләре, әзерлек һәм контракт йөкләмәләре булган гаскәрләрнең мөстәкыйль төренә әверелә.

Төп үзенчәлек булып билгеләнгән сроклы контракт тора. Кандидат белән контрактта аның тәмамлану вакыты беркетелә, ягъни бер елга һәм аннан да күбрәк вакытка төзелгән контракт тәмамлангач, ул хәрби хезмәттән азат ителә.
Хезмәт чорына өч айлык сынау срогы каралган, аның дәвамында кандидат Оборона министрлыгының уку үзәкләрендә яки җитештерүче предприятиеләрдә белем ала. Сынау срогы тәмамлангач, хезмәтне дәвам итү турында карар кабул ителә.

Пилотсыз системалар гаскәрләренә 18-45 яшьлек, күбесенчә техник яки авиация белеме булган гражданнар алына. Сәламәтлек торышына карата «А» һәм «Б» категория таләбе куела. Авыр җинаятьләр өчен хөкем ителгән затлар әлеге гаскәрләргә алынмый.  

Андрей Козлов мотивацион чаралар дәрәҗәсе турында да хәбәр итте. Сынау срогы тәмамлангач, кандидатка бер мәртәбә бирелә торган зур түләү каралган: бу – Татарстан Республикасыннан 1,5 миллион сум һәм Россия Оборона министрлыгыннан 400 мең сум. Хәрби бурычны үтәү зонасында айлык акчалата түләү, дошман техникасын җиңгән өчен премияләрне кертмичә, 210 мең сумга якын тәшкил итә.

«Бу юнәлеш безнең өчен яңа кадрлар резервы ачар дип көтәбез. Безгә тәҗрибәле, белемле һәм заманча технологияләр белән кызыксынучан кешеләр кирәк», – дип ассызыклады подполковник.

Гаскәрләрнең яңа төрен формалаштыру – заманча шартларга реакция, анда пилотсыз системалар төп рольне уйный. Киләсе елдан тиешле вазифалар барлыкка килгәндә, бу гаскәрләрдә хатын-кызлар да хезмәт итәргә мөмкин.

«Бу белемле, техник яктан әзерлекле кешеләрне җәлеп итүнең яңа чыганагын ача. Контрактның төгәл вакыты, аңлаешлы шартлары, җитди әзерлеге һәм лаеклы матди стимуллаштыру бар. Бер елны заманча техникада хезмәт итүгә багышларга була, ә аннан уникаль тәҗрибәгә ия булып, гражданлык тормышына кайтырга яки армиядә карьераны дәвам итәргә мөмкин”, - дип очрашуны йомгаклады Андрей Козлов. 

Чарада район башкарма комитеты җитәкчесе Эмиль Галеев катнашты. Ул билгеләп үткәнчә, 2023-2024 елларда район контрактчылар җыю планын 100 проценттан артыкка үтәгән. Яңа 2026 елда бу эш дәвам итәчәк.