“Геройлар белән диалоглар”: Зәйнең «Яшьлек» клубында хезмәт һәм бурыч турында сөйләштеләр

Балалар янына кунакка хөрмәтле кунаклар — «Сугышчан бердәмлек» Бөтенроссия ветераннар иҗтимагый оешмасының Зәй бүлекчәсе рәисе Сергей Хватков һәм һава десанты гаскәрләре ветераны Виктор Кулеев килде.

Чара һава десант гаскәрләре көне алдыннан узды һәм буыннар арасында ачык диалог форматында оештырылды.

Кунаклар яшүсмерләрне десант гаскәрләре тарихы белән таныштырдылар. Һава-десант гаскәрләренең тарихы 1930 елның 2 августында башлана. Ул вакытта Воронеж астында Мәскәү хәрби округының хәрби-һава көчләре өйрәнүләрендә тактик бурычны үтәү өчен беренче тапкыр 12 кешедән торган десантчылар парашютларда сикерәләр. Бу эксперимент хәрбиләргә киләчәктә парашют-десант гаскәрләренең өстенлекләрен, аларның гаять зур мөмкинлекләрен күрергә мөмкинлек бирә.

Әмма балалар өчен ветераннарның тере тарихлары аеруча кыйммәтле булды. Виктор Петрович һәм Сергей Александрович армия тормышыннан истәлекләре белән уртаклаштылар, чын десант ярдәме һәм какшамас сугышчан туганлыкның нәрсә аңлатканын сөйләделәр. Ветераннар яшүсмерләргә Ватанны саклаучының нинди сыйфатларга ия булырга тиешлеген аңлаттылар - бу көч һәм чыдамлык кына түгел, ә җаваплылык, иптәшеңә ярдәм итә белү, бурычка тугрылык.

Ветераннар үзләренең иҗтимагый эшләре, бүгенге көндә махсус хәрби операциядә катнашучыларның гаиләләренә гуманитар ярдәм күрсәтүләре турында җентекләп сөйләделәр. Мондый әңгәмәләр яшьләргә заманнар бәйләнешен һәм илне саклаучыларга ярдәм итүнең мөһимлеген яхшырак аңларга ярдәм итә.

Фотолар яшьләр эшләре идарәсеннән.