Белгеч түләүле медицина хезмәтләре алганда пациентның хокуклары турында аңлата

Түләүле медицина хезмәтләре сорап мөрәҗәгать иткәндә гражданнарның нинди хокукларга ия булуларын кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең Түбән Кама, Зәй районнарында территориаль башлыгы урынбасары Ринат Насыйбуллин аңлата.

-Түләүле медицина хезмәтләре күрсәткәндә барлыкка килә торган хокук мөнәсәбәтләрен җайга салу берничә төп документ белән гамәлгә ашырыла. Бу документлар пациентларның хокукларын яклауны тәэмин итә, медицина хезмәтләрен күрсәтүнең үтә күренмәлелеген һәм куркынычсызлыгын гарантияли. 

Медицина учреждениеләре пациентларга түбәндәге мәгълүматны бирергә тиеш: гамәлгә кую документларының, дәүләт теркәве турында таныклыкларның һәм медицина эшчәнлегенә лицензияләрнең күчермәләре; медицина ярдәме күрсәтү тәртибе һәм кулланыла торган стандартлар; медицина ярдәме күрсәтүче белгечләр турында мәгълүмат; дәвалау ысуллары, мөмкин булган куркынычлар һәм процедура нәтиҗәләре турында тулырак мәгълүмат. 

Бу мәгълүмат пациентка алда торган процедуралар турында тулы хәбәрдарлык тәэмин итеп, язма рәвештә бирелә. 
Түләүле медицина хезмәтләре күрсәтүгә килешү төзү түләүле медицина хезмәтләре күрсәтүнең мәҗбүри шарты булып тора. 

Мондый килешү  башкаручы һәм заказ бирүче турында тулы мәгълүмат, күрсәтелә торган хезмәтләрнең тасвирламасы, аларның бәясе, түләү сроклары һәм шартлары, шартнамә шартлары бозылган очракта якларның җаваплылыгы, шартнамәне үзгәртү яки өзү мөмкинлеге турында мәгълүматларны үз эченә алырга тиеш.
 

Шунысын билгеләп үтү мөһим, пациент тәкъдим ителгән дәвалауның куркынычларын һәм нәтиҗәләрен аңлап, документка үз теләге белән кул куя. Медицина хезмәтләренең сыйфаты законда билгеләнгән стандартларга туры килергә, медицина оешмасы барлык процедураларның, кулланыла торган диагностика һәм дәвалау ысулларының иминлеген тәэмин итәргә тиеш. Пациент сыйфатсыз хезмәт күрсәтү нәтиҗәсендә сәламәтлегенә яки мөлкәтенә китерелгән зыянны компенсацияләүне таләп итәргә хокуклы. 

 Пациентлар үз хокукларын турыдан-туры медицина оешмаларына дәгъва бирү юлы белән якларга хокуклы. Дәгъваны канәгатьләндерүдән баш тарткан очракта,  бәхәсне хәл итү өчен суд органнарына мөрәҗәгать итә алалар.