Югарышепкәлеләр район авылларына чыгып спектакль куя

Хәзер авыл үзешчәннәре әлеге спектакль белән район авылларына чыга, кичә алар тамашаны ут күршеләре Имәнлебашта куйды. Моңа кадәр Түбән Биштә һәм Сармашбашта булдылар.

Бу тамашада кешелеклелек һәм яхшы мөнәсәбәтләр дөньясы чагыла. Гадәттә каенана дорфа, кире образ булса, бу юлы килен усал каенана ролендә. Рәнҗетү өстенә рәнҗетү. Әнисә каенанасы Нәфисәгә көн күрсәтми. Каенана гөлләргә су сипкәне өчен дә килененнән шелтә ала. Улы Сәгыйт тә йомшак характерлы. Ә кызлары Аида зур әнисе ягында. Нәфисә картлар йортына чыгып китәргә карар иткәндә дә аңардан калмаска риза.

Рәнҗетүләрнең чигенә җиткән Нәфисә көннәрнең берсендә ялгыз ир, рәссам Фәрит белән таныша. Күп тә үтми, Фәрит Нәфисәне хәләл җефете итеп күрергә теләвен белдерә. Кавышу турында тәкъдим ясый. Бу карар хәтта дорфа киленгә аяз көнне яшен суккандай була. Фәрит Нәфисә йортына килә. Тик Нәфисәнең шатлыктан йөрәге тотып вафат була. Их, күпме рәнҗетүләрне түздең, әни, ә шатлыкны күтәрә алмадың, дип елый Сәгыйт, ә Әнисә «Рәнҗетүләрем өчен гафу ит, каенанам», дип үкенү хисләрен белдерә спектакль ахырында.

Фотолар авыл мәдәният йортыннан.