Имәнлебаш үзешчәннәре «41нең арбалы хатыннары» спектаклен куйды

Пьесада Бөек Ватан сугышы башлану белән ирләре фронтка киткән, һәрберсе үзенчә бәхетле булган япь-яшь, чибәр, уңган татар хатыннары турында сүз бара. 

...Ирләренең әле сугышка чыгып китмәгәнлекләрен, Раевка станциясендә ач ятуларын ишеткән алты хатын ирләре янына ризыклар алып, күрешеп кайтырга дип чыгып китәләр. 62 чакрым юл да, төрмә белән куркытулар да алар өчен киртә була алмый. Барып җитә алырлармы икән? Йөкләре дә бик күп? Арбаларында бала, аягы зәгыйфь хатын да бар? Күңелләрендә әзерләгән сүзләрен ирләренә әйтә алырлармы? Спектакльне караганда әлеге уйлар күпләргә тынгы бирмәгәндер...

«Бу спектакль бүгенге көндә бик тә актуаль. Бүгенге көндә дә, моннан 80 ел элек кебек үк, ир-егетләребез Ватан иминлеген саклап фронтка китәләр. Һәм шул вакыттагы кебек, без алардан хәбәрләр көтәбез, тылдагылар бергәләп җиңүне якынайтырга ярдәм итәбез. Безнең Имәнлебаш авылында да бу уңайдан зур эш алып барыла: маскировка челтәрләре үрәбез, гуманитар ярдәм җыябыз. Спектакль уйландыра да, тетрәндерә дә. Сәхнәдә үзешчәннәр бик оста уйнадылар. Рәхмәт аларга шәхси вакытлары белән исәпләшмичә репетицияләргә йөргән өчен», — ди мәдәният йорты җитәкчесе Энҗе Әхмәтҗанова.

Рольләрне Гөлзирә Хөснетдинова, Гөлнара Яббарова, Фәридә Шадыбаева, Гүзәлия Вәлиева, Энҗе Әхмәтҗанова, Илгизә Сафиуллина, Дамир Ситдыйков, Илгиз Әхмәтҗанов, Рәүфә Гәрәева, Азамат Кәрамов, Әмир Шадыбаев, Әмирхан һәм Язилә Яббаровлар оста итеп уйнады.

Фотолар мәдәният йортыннан.