Зәйнең талантлы балалары – «Созвездие-Йолдызлык -2025» фестивале төбәк туры җиңүчеләре

Ике көн дәвамында шәһәрнең Халык иҗат йорты гөр килеп торды. Анда Түбән Кама, Зәй һәм Сарман районнарыннан 1000гә якын талантлы егет һәм кыз катнашты. Зәй данын яклау өчен район турында сайлап алынган номерлар тәкъдим ителде. Барлыгы 220 дән артык яшь зәйле үз талантын күрсәтте.

«Безнекеләр барлык номинацияләрдә дә сынатмады. „Хореография“, „Вокал-соло“, „Вокаль ансамбльләр“ һәм „Конферанс“ номинацияләрендә җиңүчеләребез бар. Талантлы балаларга, аларны әзерләүче педагогларга, әти-әниләргә зур рәхмәт. Сәхнәдә безнең балаларның костюмнары аерылып торуы да күңелләрне иркәләде. Зәй районы хакимияте бу максатларга аерым финанс чыгымнары бүлә, матур киемнәр исә күркәм чыгышларны тагын да ачыграк итеп күрергә мөмкинлек бирә», — ди район яшьләр эшләре идарәсе башлыгы Гүзәл Шарәфиева.

Быел фестивальдә Бөек Ватан сугышында җиңүгә 80 ел тулу тематикасы «кызыл җеп» булып бара. Зәй коллективлары да әлеге темага күп чыгышлар әзерләгән иде. Нәтиҗәдә махсус призга «Каприз» хореография ансамбленең кечкенәләр төркеме, «Улыбка» хореография ансамбленең урта төркеме, нәфис сүздә Глафира Гордеева лаек булдылар. Ә өченче урынны «Конферанс» номинациясендә — Кристина Соловьева, «Вокал-соло» да — Глеб Макаров белән Сабина Асадова алдылар. Икенче урында — нәфис сүз остасы Есения Соловьева, «Мирас» вокаль-хореография ансамбле, «Магия» һәм «Каприз» хореография ансамбльләренең урта төркемнәре. Беренче урында һәр елдагыча аерым башкаручылар арасында Александра Шишмагаева һәм «Азаль» вокаль-хореография ансамбле.

Әлеге балалар Зәй данын Казанда узачак супер-финалда яклаячак. Барлык җиңүчеләрне зур уңышлары белән тәбриклибез.