Зәйдә махсус хәрби операциядә һәлак булган хәрбиләрнең гаиләләренә Батырлык ордены тапшырылды

Аларның әниләре, гаиләләренә орденны район башлыгы Разиф Кәримов белән хәрби комиссар Айрат Әгъләмҗанов тапшырдылар.

Рядовойлар Руслан Егоров, Тәлгать Кәримов, сержант Айдар Хәлиуллин Ватаныбыз бәйсезлеген һәм азатлыгын саклап, махсус хәрби операция барышында батырларча һәлак булды. Батыр егетләрне зал бер минут тынлык белән искә алды.

— Бөек Ватан сугышы елларында бабаларыбыз илебезне саклаган кебек бүгенге көндә Зәйнең 500дән артык егете Ватаныбыз сагында тора. Хәрби часть командирлары әйтүенчә, алар иң җаваплы урыннарда. Россиянең иреге, бәйсезлеге, суверенитеты җиңел бирелми. Егетләребез илебез азатлыгы өчен батырларча көрәшәләр, кызганыч, кайчакта үз гомерләре бәрабәренә. Аларның батырлыгы алдында баш иябез. Без Ватаныбыз иминлеге өчен гомерләрен биргән егетләребезне онытмый. Шундый уллар үстергән әниләргә бик зур рәхмәт. Дөньяда сезнең кебек әниләр юк. Шулай ук батыр егетләрнең хатыннарына — тормыш иптәшләре, балаларына әтиләре өчен рәхмәт белдерәсем килә, — диде чыгышында Разиф Галиевич.

Руслан Георгиевичның ордены — әнисе Галина Алексеевнага, Тәлгать Фәргатовичның ордены — әнисе Әнисә Котдусовна, тормыш иптәше Лилия Сөнгатулловна, кызы Эльвинага, Айдар Ниязовичның ордены әнисе Әлфия Хәсәновна, тормыш иптәше Фәридә Гомәровна, кызы Язиләгә тапшырылды.