Зәй батыр егете белән хушлашты

Бүген зәйлеләр махсус хәрби операция зонасында батырларча һәлак булган кече сержант Альберт Шамгунов белән хушлаштылар.  

Альберт Кәрим улы белән хушлашу мәрасиме шәһәрнең “Энергетик” Мәдәният сараенда оештырылды. Анда район, республика җитәкчелеге, егетнең гаиләсе, туганнары, дуслары, хезмәттәшләре, хәрби хәрәкәтләр ветераннары һәм зәйлеләр җыелды.

Альберт Шамгунов Донецк һәм Луганск халык республикаларында хәрби бурычын үтәгәндә 2023 елның 27 декабрендә батырларча һәлак булган.  Ул – Зәй егете, 2нче мәктәптә белем алган, аннан политехник колледжда пешекче һөнәрен үзләштергән. 18 яшендә Ватан алдында хәрби бурычын үтәргә алынган. Мобилизациягә кадәр “Аккурайд уилз Руссиа” ҖЧШендә хезмәт куйган. 2022 елның сентябрендә Ватаныбыз сагына беренчеләрдән булып баса һәм алгы сызыкта көрәшә. Альберт Кәримовичның өч улы калды.

Хушлашу мәрасимендә район башлыгы Разиф Кәримов, ТР Хөкүмәтеннән район кураторы Иван Гущин, район хәрби комиссары урынбасары Рафис Гыймазов чыгыш ясадылар.

-Бүген без якташыбыз Альберт Шамгуновны  соңгы юлга озатабыз. Кызганычка каршы, сугыш югалтуларсыз булмый. Альберт Шамгунов  илебезнең азатлыгы, тыныч күк йөзе өчен гомерен бирде. Бүген батыр егетнең  якыннарының кайгысын бернинди сүз белән дә җиңеләйтеп булмый. Без сезнең белән бергә кайгырабыз, сез илебезнең чын патриотын тәрбияләгәнсез, без сезнең улыгыз белән горурланабыз. Альберт турында якты истәлекләр безнең күңелләрдә мәңге яшәр, - дип Разиф Галиевич Альберт Шамгуновның әнисе Людмила Михайловна, тормыш иптәше Альбина Заһитовна, уллары, якыннарының авыр кайгысын уртаклашты.

Батыр егетләрне зал бер минутлык тынлык белән искә алды.

-Бүген безнең егетләребез үз тормышлары бәрабәренә киләчәк буынның азатлыгы һәм бәйсезлеге өчен көрәшә. Альберт Шамгунов тормышы безнең барыбыз өчен дә Ватанга хезмәт итү үрнәге булып тора.  Ул - Россия һәм Татарстан горурлыгы. Аның каһарманлыгы күп буыннар өчен батырлык үрнәге булып калачак, - диде чыгышында Иван Гущин.

Россия Оборона министрлыгы, республика хәрби комиссариаты, егетләр хезмәт иткән командование часте исеменнән кайгы уртаклашу сүзләрен Рафис Гыймазов җиткерде.

Альберт Шамгунов, һәлак булганнан соң, Батырлык ордены белән бүләкләнде. Орденны аның әнисе  Людмила Михайловнана  район башлыгы Разиф Кәримов һәм хәрби комиссар урынбасары Рафис Гыймазов тапшырды.

Альберт Яңа шәһәр зиратында җирләнде.