Радик Сәлахов алтынчы мәртәбә Россия чемпионы исемен яулады

Финалда Радик Сәлахов Башкортстаннан килгән көндәшен аркасына салып, зур җиңү яулады һәм алтынчы тапкыр Россия чемпионы исемен яулады.

— Бу ярышларга мине тренер Илнур Нурисламович Хәйбуллин әзерләде. Ул да Зәйдән. Бер ел дәвамында тырышып әзерләнергә, шөгыльләнергә туры килде, — ди спортчы.

Быел Казанда БРИКС саммиты узачак һәм анда Россия җыелма командасы составында Радик Салахов та катнашачак.

Радик Сәлахов — Зәй районы Сармашбаш авылы егете. Алты яшеннән милли көрәш белән шөгыльләнә. 2000 елда спортта беренче җиңү яулый. Зәйдә 8 тапкыр Сабантуй батыры була. Узган ел Кемерово шәһәрендә, шулай ук Киров өлкәсендә федераль Сабантуе батыры булды.

Хәзерге вакытта ул Чаллы шәһәрендә яши.

Фото Радик Сәлахов архивыннан