Махсус хәрби операция зонасыннан ялга кайткан Сәвәләй егете өйләнде

Андрей кәләше Ксения белән мобилизация игълан ителгәнче танышканнар.  2022 елның октябрь ахырында Ксения Андрейны өлешчә  мобилизация буенча чакырылгач озатып, көтәргә вәгъдә итеп кала. Андрей мәктәпне тәмамлагач, Зәй политехник көллиятендә укыган. Краснодар краенда армиядә шофер булып хезмәт иткән.

 - Ксения - бик кыю, авырлыклардан курыкмый торган кыз, мин аны яратам, - ди Андрей.

Яшь парны тантаналы көннәре белән район башлыгы Разиф Кәримов котлады.

- Кадерле яшь парларыбыз, сезне гаилә кору көнегез белән котлыйбыз. Гаиләгез нык булсын, бәхетле булыгыз. Андрейга исән-сау, җиңү белән  әйләнеп кайтуын телим, -  диде район башлыгы Разиф Кәримов.

Яшь парларны шулай ук Сәвәләй авыл җирлеге башлыгы Илгиз Галимов, керәшен җәмгыяте рәисе Валентин Атласов, керәшен җәмгыятеннән Николай Токранов тәбрикләделәр.

Мобилизация башланганнан бирле Зәй районында 10 пар никахларын законлы төстә теркәгән һәм махсус хәрби операция уздыру зонасында хезмәт итүче хәрбиләрнең гаиләләрендә 4 бала туган.

Тиздән Андрей кабат махсус хәрби операция зонасына үзенең хәрби иптәшләре янына китәчәк, ә аның тормыш иптәшенә, әти-әнисенә һәм якыннарына нык булырга һәм кадерле кешеләренең  исән-сау, горурлык һәм җиңү белән кайтачагына ышанырга кала.