Көннәрнең коры торуы янгын куркынычсызлыгына җитди әзерлекне сорый

Утырышны район гадәттән тыш хәлләр комиссиясе рәисе, район башкарма комитеты җитәкчесе Эмиль Галеев үткәрде. Ул узган елгы статистикага тукталды.

«Узган ел район территориясендә 77 янгын чыгу очрагы теркәлгән, аларда ике тән җәрәхәте алучы һәм бер һәлак булучы бар. Агымдагы ел башыннан районда 12 янгын чыгуы билгеле, шуларның берсендә кеше җәрәхәтләнгән», — диде ул.

Зәй районы буенча янгын куркынычсызлыгын күзәтү эшчәнлеге бүлеге башлыгы Андрей Кириллов янгыннарның төп сәбәпләрен атады.

«Алар арасында кипкән үлән яндыру, көздән калган чүп-чарны ягу, торак пунктлар читләрендә калдырылган чүп-чарга ут төртү аркасында янгын чыгуга китергән очраклар бар. Шунысын истән чыгармаска кирәк, чүп-чарны яндыру катгый кагыйдәләрне үтәгәндә генә рөхсәт ителә. Моның өчен җилсез вакытны сайларга, махсус әзерләнгән чокырларга яндырасы чүпне җыярга һәм корылмалардан куркынычсыз ераклыкта булган урыннарда гына ут белән эш итәргә кирәк. Әмма, ачыкланганча, авыл җирлекләренең берсе дә әлегә кадәр мондый гамәлләр өчен рәсми урыннар билгеләмәгән, гәрчә тиешле тәкъдимнәр 2024 елның көзендә үк бирелгән булса да», дип басым ясады Андрей Кириллов.

Билгеле булганча, 18 мартта районда янгын куркынычы сезонына әзерлекне тикшерделәр. Утырышта өстәмә профилактика чаралары, шул исәптән чүп-чар яндыруны контрольдә тоту, халык белән аңлату эшләре алып бару һәм санкцияләнмәгән чүплекләрне бетерү турында фикер алыштылар. Эмиль Галеев хезмәт күрсәтүче оешмалар җитәкчеләренә һәм күзәтчелек органнарына быел янгыннар саны артуга юл куймау һәм кешеләр үлемен булдырмау өчен барлык кирәкле чараларны күрергә кушты.

Зәй районында яшәүчеләрне янгын куркынычсызлыгы кагыйдәләрен үтәргә һәм хокук бозулар турында хәбәр итәргә чакыралар.