Зәй шәһәр суды кеше үтерүдә шикләнелүчене ике айга арестка алды

24 мартта Зәйнең социаль челтәрләрендә кешеләргә пычак белән янаучы ир-ат турында хәбәр таралды. Шул көнне иртән шәһәрнең Крупская урамында, канга баткан ир-егет табылуы хакында да мәгълүмат булды. Социаль челтәрләрдән файдаланучылар аны фотога да төшергән иделәр.
Әлеге җинаятьне кылуда шикләнелүче ир-атны, хокук саклау органнары хезмәткәрләре шул ук көнне тоткарлаганнар һәм аңа карата РФ Җинаять Кодексының 105нче маддәсе 1нче бүлеге (үтерү) буенча гаепләү эше кузгатылган.
Судта тикшерүче, гаепләнүчегә карата арест салу мөһимлеге турында белдергән, чөнки аның качып китү, шаһитләргә янау, иректә калган очракта әйләнә-тирәдәгеләргә куркыныч тудыру ихтималы булуы ассызыкланган.
Гаепләнүче үзе һәм аның яклаучысы өй аресты сораганнар, әмма суд тикшерүче атаган сәбәпләр белән килешкән, гаепләнүче сак астына алынган.
Тикшерү версиясе буенча, шикләнелүче ир-ат, 24 мартта иртән Крупская урамы 1нче йорт янында исерек хәлдә булган. Үзара низаг чыгып, ул таныш ир-егеткә пычак белән ташланган, алган яралардан әлеге ир-егет шул урында ук үлгән.
Үтерү өчен РФ Җинаять Кодексының 105нче маддәсе 1нче бүлеге буенча, 15 елга иректән мәхрүм ителү карала. Тикшерү эше дәвам итә, суд якын айларда булачак, дип хәбәр итәләр шәһәр судыннан.