Зәй эзтабарлары дүрт көн эчендә Сталинград сугышында һәлак булган 14 сугышчыны тапкан

«Гвардия» эзләү отряды 23 апрельдә Волгоград өлкәсенә юл тотты. Казуларның беренче дүрт көнендә үк Зәй эзтабарлары Сталинград янындагы сугышларда һәлак булган Кызыл Армиянең 14 сугышчысын җирдән күтәргәннәр. Кызганычка каршы, аларның шәхесләрен билгеләү мөмкин булмаган. Шулай ук отряд әгъзалары күпме еллар дымлы җирдә яткан башка күп кенә әйберләр - каскалар, сапогилар, гранаталар, мылтыклар һәм пистолетлар, танк снарядлары, противогазлар тапкан.
Зәйгә кайткач эзтабарлар үз экспедицияләренең нәтиҗәләре турында җентекләбрәк сөйләячәк.
Экспедиция “Тарихка кагыл, хәтерне сакла!” проекты кысаларында уза.

Фотолар “Гвардия” отрядыннан.