Махсус хәрби операциядән ялга кайткан Зәй егете өйләнде

Илдар сөйгәне Ләйсәнгә кияүгә чыгарга тәкъдим ясаган һәм аның «әйе» дигән җавабын алгач, ЗАГСка гариза биргәннәр.
 

Илдар агымдагы елның язында контракт төзеп Ватаныбыз сагына баскан. Ул эчке эшләр бүлеге системасында хезмәт куйган. Хәрби буларак, ил өчен катлаулы вакытта читтә кала алмаган.
 

-Бик күп егетләр, дусларым мобилизация буенча китте. Аларга ярдәм, авыр вакытта бергә булу кирәк. Безнең частьтә бик күп Зәй егетләре хезмәт итә. Без бер-беребезгә терәк булып хезмәт итәбез, бер-беребезнең кадерен беләбез. Гуманитар ярдәм килә, моның өчен зәйлеләргә бик зур рәхмәт. Маскировка челтәрләре үрүчеләр аерым хөрмәткә лаек, - ди Илдар.
 

Ләйсән белән алар район эчке эшләр бүлегендә хезмәт куйганда танышканнар. Башта бер-берсенә игътибар итмәсәләр, соңрак аралаша башлагач, алар арасында мәхәббәт утлары кабынган.

-Илдар махсус хәрби операциягә китәм дигәч, бик кайгырдым. Исән-сау булуларын телим. Аллага шөкер, исән-сау ялга кайтты. Мин аны көтәчәкмен, - диде Ләйсән.
 

Яшь гаиләне әти-әниләре, якыннары котлады. Район башлыгы урынбасары Петр Уразайкин район башлыгы Разиф Кәримов исеменнән котлау сүзләрен җиткереп, яшь гаиләнең бәхетле булуын, Илдарның исән-сау җиңү белән кайтуын теләде.
 

Тантанада катнашучы башкалар да яшь гаиләгә изге теләкләр юлладылар.