Ураза гаетендә Зәй районы мөселманнары иртән иртүк мәчетләргә килде

Ай буена ашау-эчүдән, яман гадәтләрдән тыелып торган, ураза тоткан, мохтаҗларга ярдәм иткән, күркәм ифтар ашлары үздырган мөселманнар изге бәйрәмне каршылады.
Иртәнге сәгатьләрдән районыбыздагы барлык мәчетләрдә халык катнашында гает намазы укылды, вәгазьләр тыңланды, тәкъбирләр әйтелде.
Мәчеткә килүчеләр саны шактый иде, араларында яшьләр, балалар булуы да күркәм күренеш.
Зәйнең үзәк мәчетенә Гает бәйрәме белән котларга Зәй муниципаль район башлыгы Разиф Кәримов килде, ул мөселманнарга изге теләкләрен җиткерде.

–Чын күңелдән Рамазан ае тәмамлану, Ураза гаете белән тәбриклим. Шунысы куанычлы, муниципаль районыбызның мөселман оешмалары үсеп килүче буынны тәрбияләүгә, дуслык традицияләрен үстерүгә, мәдәниятләрне баетуга зур өлеш кертәләр. Сез махсус хәрби операциядә катнашучыларга һәм аларның гаиләләренә мөһим гуманитар ярдәм күрсәтәсез, районда уздырыла торган барлык чараларда да актив катнашасыз. Аллаһы Тәгалә сезгә, йортларыгызга тынычлык, иман нуры бирсен. Илләребезгә муллык, һәрбер гаиләгә татулык-иминлек телим, - диде ул.

Татарстан мөфтие исеменнән котлауны районы имам-мөхтәсибе Фатих хәзрәт Нуруллин җиткерде һәм бәйрәм вәгазен укыды.
 Бу көнне һәр йортта бәйрәм өстәле, коймак, таба ашы әзерләнә. Бәйрәм өч көн дәвам итә. Туганнар, дуслар белән күрешү, авыру кешеләрнең, ялгызларның, картларның хәлен белешү, зиратларга бару, мәрхүмнәрне догалар белән искә алу – бәйрәмнең матур гадәтләре.