Бүген Зәйдә чөгендер алуга керештеләр

Һава торышының яхшы торуы эшне туктатмыйча алып барырга мөмкинлек бирә. Беренче булып эшне «Зәй шикәре» агрофирмасы хезмәтчәннәре башлады.

Быелгы һава торышы чөгендер өчен уңай килде: вакытында җылысы да, яңгыры да булды. Шуңа күрә гектарыннан 450 центнер уңыш чыга, ди белгечләр. 

-Җиң сызганып, яз-җәй буе үстергән шикәр чөгендере уңышын җыярга керештек. Моның өчен 4 Ропа Тигр комбайны җәлеп ителде. Безнең «Зәй шикәре» агрофирмасы кырларында татлы тамырны 2900 гектарда үстерелде. Быел уңыш бик яхшы булырга охшаган, — дип безне агрофирманың баш инженеры Илдар Вәлиәхмәтов каршы алды. 

Иртәдән көннең җылы, кояшлы булуына сөенә авыл хезмәтчәннәре. Басуда эшне оештыру һава шартларына бәйле шул. Алышынмас кадрларның берсе — Шәйхенур Миңнекәев. Бу тармакта ул 40 елдан артык хезмәт куя, шуның 36 елын чөгендер алуга багышлаган. Моңа кадәр икмәк суктыруда катнашты. Хәзер чөгендер алу комбайнына утырган. Кайда гына эшләсә дә — алда торучы бурычны яхшы аңлый, тир түгеп, зур авырлыклар белән үстерелгән уңышны югалтуларсыз җыеп алырга кирәк, — ди механизатор. 

Илгиз Биккинин чөгендер алуда икенче сезон гына эшләсә дә, куәтле техниканы тиз үзләштергән. 

Эш барышы район башлыгы Разиф Кәримовның да контролендә. 

-    Без бу эшне  республикада беренчеләрдән булып башлыйбыз, быел бик зур күләм көтелә – 1 миллион 300 мең тонна чөгендер чыгар дип көтәбез. Комбайннар икешәр механизатор белән тәэмин ителгән. Алар бер сменада гына эшләячәк. Безнең бурыч - көнгә 3 мең тонна шикәр чөгендере казу. Зәй шикәр заводы да чимал кабул итәргә тулысынча әзер. Хәерле сәгатьтә булсын!- ди район башлыгы. 

Быел шикәр чөгендеренең уңышы яхшы, татлы тамыр өлгергән. Санаулы минутлар эчендә басу уртасында чөгендер тавы барлыкка килә. Район басу-кырларында шикәр чөгендере барлыгы 9300 гектар мәйданда үстерелгән. 21 августта калган агрофирмалар да татлы тамыр казу эшен башладылар.