Ватан сакчылары, дигән горур исемне йөртүче райондашларыбыз белән чын күңелдән горурланабыз

Кадер авылы егете Юдин Артём Альбертович 2019 нчы елны Яр Чаллы шәһәре Л. Б. Васильев исемендәге Кама дәүләт автомеханика техникумына электрик һөнәре белгечлегенә укырга керә. Үзен актив студент итеп таныта, төрле чараларда, аеруча спорт ярышларында актив катнаша. 2023 нче елда техникумны тәмамлагач, үз теләге белән көзге чакырылышта армия сафларына китә. Бүгенге көндә Нижегородск өлкәсе Саров шәһәренең Берещино поселогында Росгвардия гаскәрендә хезмәт итә.
— Һәр сау-сәламәт егет армия сафларында хезмәт итәргә тиеш, мин дә армиягә барам, дип хыялланып йөрде Артем. Менә 4 ай вакыты узып та киткән. Телефон аша гел аралашып торабыз, аның тавышын ишетү — бик зур сөенеч. Хезмәтеннән зарланмый, — ди әнисе Татьяна ханым.

Ватанны саклау, халыкның азат һәм тыныч яшәешен тәэмин итү өчен армиядә хезмәт итү, тәвәкәллек һәм батырлык күрсәтү — һәр ир-егетнең бурычы. Артемның да, солдат мәктәбен горур узып, туган якларга исән-сау кайтуын теләп калабыз.